کوردۆ گەلۆ
کوردۆ؛ گەلۆ؛
هۆزی چەوساوەی شۆڕش-وان!
وەرن هەتا لە قوژبنێکی خۆشەویستی دنیادا؛ لە کوردستان؛
جەژنی شۆڕش، بە ئاگرباران کردنی داگیرکەران بەرپا بکەین.
یادیان بەخێر، شەهیدە خۆشەویستەکان؛
هەزار بریا، لێرە بان و بیاندیبا،
چۆن زەحمەتکێشی کوردوستان
جەژنی شۆڕش بە ئاگرباران کردنی چەوسێنەران بەرپا دەکەین
وەکوو شەهید فوئاد وتی: با هەل خواز و هەل-پەرستان بلوورێنن
چاوەکانم؛ چاو لە ئاسۆی بەرین بگرین، تەماشاکەین؛ وا شۆڕشە و سەردەکەوێ
شؤڕشە و گەشاوەتەوە؛
هەزار بریا، شەهیدە خۆشەویستەکان لێرە بان و بیان دیبا
دەستە-دەستە لاوی کارگەر و زەحمەتکێش
پێ دەنێنە ڕێبازی سەختی پڕ-ئەندێش
دایکی شۆڕشگێڕ و دلێر نێوچاوی بەرزیان ماچ دەکا
کوردۆ گەلۆ؛
هەزار بریا شەهیدە خۆشەویستەکان لێرەبان و بیان دیبا
کە چەند ئاسایي بووەتەوە و هەر لەمێژە،
تفەنگ و ڕەخت و فیشەکدان، سەرینی نەرمی لاوانە؛
بیان دیبا، چۆن هەڵمەتی پێشمەرگەکان، دوژمنەڕاوی کردوەتە کاری ئاسایي ڕۆژانە!
بیان دیبا، لەکاتێکدا شکاوە قەڵای ترس و سام
لەکاتێکدا بووەتە ژووری زاوایەتي، ژووری ئیعدام،
بەکام لەمپەر ئەم لافاوە ڕادەوەستێ!؟!
کامە شوورە، دیوار، قەڵا، بنەمای سستی زۆرداري؛
، بنەمای سستی سەرمایە، دەپارێزێ لە شکان، ڕووخان، داشۆران؟!؟
١٣٦١/١٩٨٢
دیدگاهتان را بنویسید